خُواہشیں جب کُوئے جاناں کی ہوا کھانے لگیں
عنبریں زُلفوں کے پیچ و خم سے چکرانے لگیں
دل پہ پھر مدہوشیاں طاری ہوئیں جذبات کی
خُوشبوئیں احساس کی دہلیز تک آنے لگیں
عکسِ جاناں ذہن سے سرگوشیاں کرنے لگا
جب بہاریں گُلشنِ ہستی کو مہکانے لگیں
لو تمنائیں اُڑیں بادِ صبا کے دوش پر
اور وصلِ مہوشِ خوش خُو کو اُکسانے لگیں
کروٹیں بدلا کیا بیمارِ سوزِ عشق یوں
ساعتیں پل پل شبِ فُرقت کی تڑپانے لگیں
آرزوئیں بے قراری کو ہوا دیتی رہیں
پھر گھٹائیں بیدلی کی ذہن پر چھانے لگیں
احسن لکھنوی
No comments:
Post a Comment