یہ سچ ہے کلمۂ حق ان کو ناگوار ہوا

 یہ  سچ ہے کلمۂ حق ان کو ناگوار ہُوا

یہ اک قصور مگر ہم سے بار بار ہوا

قصاص مانگنے نکلے تھے آج شہر کے لوگ

یہ حادثہ پسِ دیوارِ شہریار ہوا

مِرے لہو نے دیا آب و رنگ پھولوں کو

ہر ایک قطرۂ خوں قاصدِ بہار ہوا

نگاہِ حسن میں، خود آگہی ہے گستاخی

یہ رمزِ عشق سرِ دار آشکار ہوا

یہ حیرتیں بھی مقدر ہوئی تھیں میرے لیے

خزاں کا نام مِرے عہد میں بہار ہوا

مری زباں، مِرے لہجے پہ لوگ ہنستے ہیں

میں اجنبی ہوں، یہ احساس بار بار ہوا

راز مرادآبادی