میری غزلوں میں جو روانی ہے

 میری غزلوں میں جو روانی ہے

شرحِ غم ہائے زندگانی ہے

جو ملا ہے مجھے شعورِ سخن

اک ستمگر کی مہربانی ہے

تم نہیں، تو نہیں اور آپ نہیں

اک مخاطب پسِ معانی ہے

کُشتۂ یک نگاہِ یار ہوں میں

تذکرہ میرا جاوِدانی ہے

دیکھیے عظمتِ تنِ خاکی

مسکنِ روحِ آسمانی ہے

غایتِ اہلِ شوق بھی دیکھو

خوب رُویانِ بزمِ فانی ہے

ترکِ عیش و نشاطِ دنیا بھی

ساز و سامانِ شادمانی ہے

قصۂ دردِ دل جو ہے طاہر

کچھ حقیقت ہے کچھ کہانی ہے

طاہر ضیا