پھول ہے نہ خوشبو ہے چاندنی نہ شبنم ہے

 پھُول ہے نہ خُوشبو ہے چاندنی نہ شبنم ہے

زندگی حقیقت میں حادثوں کا سنگم ہے

آپ ہی بتائیں اب، کون سا یہ عالم ہے؟

دوستی کے ہاتھوں میں دُشمنی کا پرچم ہے

پھیلتے اندھیروں میں، بے رُخی کے جھونکوں سے

آج کل وفاؤں کا ہر چراغ مدھم ہے

آدمی تو بستے ہیں ان گِنت یہاں، لیکن

کوئی دورِ حاضر میں رام ہے نہ گوتم ہے

دیکھ کر بھی جیسے وہ دیکھتے نہیں مجھ کو

پیار کا وہ اک رِشتہ آج تک بھی قائم ہے

موت سے کنول مجھ کو خوف ہو تو کیونکر ہو

موت عارضی ٹھہری، زندگی تو پیہم ہے

ڈی راج کنول

پنڈت دیس راج شرما