ظُلمت کو پردھان بنا کر دیکھ لیا
سُورج کو بے جان بنا کر دیکھ لیا
اب جو لنکا ہار گئے تو رونا کیا
بھیدی کو دربان بنا کر دیکھ لیا
خیر دُعائیں لب پر ہی دم توڑ گئیں
جذبوں کو بھگوان بنا کر دیکھ لیا
دیکھ دیوتا! آخر تیرے کہنے پر
شُعلوں کو مہمان بنا کر دیکھ لیا
ہم تو بے گھر ہو کر بھی اب جی لیں گے
تُو نے تو ایوان بنا کر دیکھ لیا
دل میں سُلگتی آگ ابھی تک باقی ہے
دریا بھی پہچان بنا کر دیکھ لیا
زخم اکیلے پن کا ساجد بھر نہ سکا
صحرا بھی گُنجان بنا کر دیکھ لیا
قمر ساجد
No comments:
Post a Comment