کبھی اکیلے میں مل کر جھنجوڑ دوں گا اسے

کبھی اکیلے میں مِل کر جھنجوڑ دوں گا اسے

جہاں جہاں سے وہ ٹُوٹا ہے، جوڑ دوں گا اسے

مجھے ہی چھوڑ گیا، یہ کمال ہے اس کا

ارادہ میں نے کیا تھا کہ چھوڑ دوں گا اسے

پسینہ بانٹتا پھرتا ہے ہر طرف سورج

کبھی جو ہاتھ لگا تو نچوڑ دوں گا اسے

مزہ چکھا کے ہی مانا ہوں میں بھی دنیا کو

سمجھ رہی تھی کہ ایسے ہی چھوڑ دوں گا اسے

بچا کے رکھتا ہے خود کو وہ مجھ سے شیشہ بدن

اسے یہ ڈر ہے کہ توڑ پھوڑ دوں گا اسے

راحت اندوری