جہان فن میں وہی شخص نام پاتا ہے

جہانِ فن میں وہی شخص نام پاتا ہے
جو حرف حرف کو دل کا لہو پلاتا ہے
جو ظاہراً نہیں آیا ہے ایک مدت سے
وہ روز یاد کے آنگن میں آتا جاتا ہے
ہوائے شوق سے اک بار جو گزر جائے
 تمام عمر ہواؤں سے خوف کھاتا ہے
تمہاری یاد مرے ساتھ ساتھ چلتی ہے
تمہارا عکس مجھے راستہ دکھاتا ہے
اسے کہو کہ وہ نانِ جویں کی فکر کرے
فلک سے روز ستارے جو توڑ لاتا ہے
خزاں کی شام میں امید کا پیمبر دل
نویدِ صبحِ بہاراں سنائے جاتا ہے
طلوعِ صبح کا منظر ہے سب کی آنکھوں میں
اس اعتماد سے کوئی دِیا بجھاتا ہے
کبھی کبھی تو مرا دم نکلنے لگتا ہے
کبھی کبھی وہ مجھے اتنا یاد آتا ہے
اسے بتا دے کوئی وقت نے ٹھہرنا نہیں
تمہاری یاد کا موسم گزرتا جاتا ہے

افتخار حیدر