کوئی منزل تھی کہاں ترک طلب سے آگے

کوئی منزل تھی کہاں ترکِ طلب سے آگے

پھر بھی ہم ہیں کہ چلے جاتے ہیں سب سے آگے

اب کہاں جاں کے عوض جنسِ وفا ملتی ہے

یہ مگر شہر کا دستور تھا اب سے آگے

کون کہتا ہے نہیں چارۂ بیمارئ دل

ایک مے خانہ بھی پڑتا ہے مطب سے آگے

'نہ بہ زورے نہ بہ زاری نہ بہ زر می آید'

بات بڑھتی ہی نہیں ہے کسی ڈھب سے آگے

تجھ کو اب کیسے بتائیں وہ ترا ہجر نہ تھا

ہم پریشاں تھے کسی اور سبب سے آگے

جب سے یہ سلسلۂ تیغ و گلو جاری ہے

اہلِ دل اہلِ زمانہ سے ہیں تب سے آگے

ہم کہ شائستۂ تہذیبِ محبت ہیں فرازؔ

ہم نے رکھا نہ قدم حدِ ادب سے آگے

احمد فراز