اپنے رستے ہوئے زخموں کی قبا لایا ہوں

اپنے رِستے ہوئے زخموں کی قبا لایا ہوں
زندگی میری طرف دیکھ کہ میں آیا ہوں
تشنگی حد سے سوا تو نہ تھی میخواروں کی
جانے کیوں جام اٹھاتے ہوئے تھرایا ہوں

کام آئی ہے وہی زلف جو میری نہ ہوئی
وقت کی دھوپ میں جس وقت میں کمہلایا ہوں
خیریت پوچھنے والے ہیں بہت سنجیدہ
جرم اتنا ہے کہ اک شوخ کا ہمسایہ ہوں
صبح ہو جائے تو اس پھول کو دیکھوں کہ جسے
میں شبستانِ بہاراں سے اٹھا لایا ہوں
عصرِ نو! مجھ کو نگاہوں میں چھپا کر رکھ لے
ایک مٹتی ہوئی تہذیب کا سرمایہ ہوں

 

مظہر امام