یوں بھی ترا احسان ہے آنے کے لیے آ

یوں بھی تِرا احسان ہے آنے کے لیے آ

اے دوست! کسی روز نہ جانے کے لیے آ

ہر چند نہیں شوق کو یارائے تماشا

خود کو نہ سہی مجھ کو دکھانے کے لیے آ 

یہ عمر یہ برسات، یہ بھیگی ہوئ راتیں

ان راتوں کو افسانا بنانے کے لیے آ

جیسے تجھے آتے ہیں نہ آنے کے بہانے

ایسے ہی کسی روز نہ جانے کے لیے آ

مانا کہ محبت کا چھپانا ہے محبت

چپکے سے کسی روز جتانے کے لیے آ

تقدیر بھی مجبور ہے، تدبیر بھی مجبور

ان کہنہ عقیدہ کو مٹانے کے لیے آ

عارِض پہ شفق، دامنِ مژگاں پہ ستارے

یوں عشق کی توقیر بڑھانے کے لیے آ

طالبؔ کو یہ کیا علم کرم ہے کہ ستم ہے

جانے کے لیے، روٹھ منانے کے لیے آ

طالب باغپتی