دل سے یا گلستاں سے آتی ہے

دل سے یا گلستاں سے آتی ہے

تیری خوشبو کہاں سے آتی ہے

کتنی مغرور ہے نسیمِ سحر

شاید اس آستاں سے آتی ہے 

خود وہی میرِ کارواں تو نہیں

بوئے گل کارواں سے آتی ہے

ان کے قاصد کا منتظر ہوں میں

اے اجل! تُو کہاں سے آتی ہے

ہو چکیں آزمائشیں اتنی

شرم اب امتحاں سے آتی ہے

عین دیوانگی میں یاد آیا

عقل عشقِ بتاں سے آتی ہے

تیری آواز گاہ گاہ اے دوست

پردۂ سازِ جاں سے آتی ہے

شکوہ کیسا کہ ہر بلا اے دوست

جانتا ہوں کہاں سے آتی ہے

دل سے مت سرسری گزر کہ رئیسؔ

یہ زمیں آسماں سے آتی ہے

رئیس امروہوی