زبان رقص میں ہے اور جھومتا ہوں میں

 زبان رقص میں ہے اور جھومتا ہوں میں

کہ داستانِ محبت سنا رہا ہوں میں

نہ پوچھ مجھ سے مِری بیخودی کا افسانہ

کسی کی مست نگاہی کا ماجرا ہوں میں

کہاں کا ضبطِ محبت کہاں کی تاثیریں

تسلیاں دلِ مضطر کو دے رہا ہوں میں

پھر ایک شعلۂ پر پیچ و تاب بھڑکے گا

کہ چند تنکوں کو ترتیب دے رہا ہوں میں

تمہارے عشق میں مٹ کر تمہیں دکھا دونگا

نگاہِ ناز کا ایماں سمجھ گیا ہوں میں

گوپال متل