میرے اقرار پہ اس شخص کے انکار پہ خاک

میرے اقرار پہ اس شخص کے انکار پہ خاک

اے محبت! تِرے پیرایۂ اظہار پہ خاک

ایسی تلوار پہ خاک، اس سپہ سالار پہ خاک

سر قلم کر دے جو تاریخ کا، اس وار پہ خاک

وہ ہو بنگال کا جعفر، کہ دکن کا صادق 

یا کوئی اور ہو، ہر عہد کے غدار پہ خاک

کسی حاکم سے، رعایا نہیں خوش تو اس کے

سِیم و زر، جاہ و حشم، جبہ و دستار پہ خاک

تُو نے اس شہر میں آسیب اتارے ہیں بہت

تِرے خوابوں پہ، تِرے دِیدۂ بیدار پہ خاک

روشنی، وہ بھی فقط ایک دِیے کے گھر میں

ظلمتِ شب! تِری آزادئ اظہار پہ خاک

اپنے گھر سے میں نکل کر کہاں جاؤں تِرے بعد

خاک اڑاتے ہوئے ان کوچہ و بازار پہ خاک 

بے گناہی کی سزا کاٹ رہا ہوں اب تک

زندگی! تیری کہانی، مِرے کردار پہ خاک

گھر کی دہلیز پہ بیٹھی ہوئی بڑھیا نے کہا

ہجر آباد رہے گا، تِرے دِیدار پہ خاک

المیہ ہے یہ اس عہد کا زاہد آفاقؔ

دیدہ ور خاک ہوئے، دیدۂ بیدار پہ خاک

زاہد آفاق