مقدر نے کچھ اس انداز سے دست ہنر رکھا

مقدر نے کچھ اس انداز سے دستِ ہنر رکھا

کہ ہم کو مبتلائے کاروبارِ چشمِ تر رکھا

میں جس کو رات دن خورشیدِ عالم تاب کہتا تھا

مجھے اس نے سدا جیسے غبارِ رہگزر رکھا

تعلق اس نے یوں مجھ سے باندازِ دگر رکھا

کہ میرے سامنے ہر روز اک تازہ سفر رکھا

بڑا نادان ہے تحقیق کی خو چھوڑ دی جس نے

سماعت کو مقفل، اور نِگہ کو بے بصر رکھا

کہیں اوجِ ثریا کی حدوں کو پار نہ کر لوں

اسی اک خوف سے اس نے مجھے بے بال و پر رکھا

مِری آنکھوں میں لکھا ہے کہ میں کل شب نہیں سویا

تمہارے خواب کو آنکھوں میں میں نے رات بھر رکھا

’’تمہارے سارے غم اے کاش اپنے سر میں لے لیتی‘‘

یہ کہہ کر اس نے اپنا ہاتھ میرے ہاتھ پر رکھا

عبدالرحمان واصف