یہ طلسم مرگ و حیات بھی کوئی خواب ہے

یہ طلسمِ مرگ و حیات بھی کوئی خواب ہے

مِری گفتگو، تِری بات بھی کوئی خواب ہے

کوئی کھیل سا ہے یہ موسموں کی لپک جھپک

سفرِ ثبات و حیات بھی کوئی خواب ہے

نہ یقین کر، کہ یہ عمر وہم و گمان ہے

تِرا جسم اور مِری ذات بھی کوئی خواب ہے

ہیں فریب سارے قریب و دور کے سلسلے

مِرے ہونٹ بھی، تِرا ہاتھ بھی کوئی خواب ہے

تُو قریب ہے یا تِرے خیال کا لمس ہے

کہ یہ خوابناک سی رات بھی کوئی خواب ہے

عبدالرحمان واصف