غم زدہ دیوتا

غم زدہ دیوتا

احساس کے برف زار میں 

ایستادہ وہ غم زدہ دیوتا

جس کی نظر میں 

دشتِ خیال 

بحرِ وبال

سوچ کا زمستاں

آرمیدہ ہے 

غم زدہ دیوتا 

کمر خمیدہ ہے

وہ نقیبِ بغاوت 

تو کبھی 

مجسمۂ قساوت و قلبِ سقاوت

وہ درویش، وہ صوفی 

وہ مجذوبِ لا 

جسے کہیں نہ اماں ملی 

کبھو نہ راحتِ جاں ملی 

مراقبوں میں مشاہدوں میں

تلاشِ منزل میں جُتا رہا 

کوئی صحیفہ، کوئی عقیدہ

اسے مسخّر نہ کر سکا تھا

کبھی وہ ایراں میں اجنبی تھا

کبھی تلاشے

گماں کا ممکن 

خلاصۂ دانش 

لا مساوی انسان نکلا 

تیرِ عقل، کماں سے نکلا

خیال کے وہ سیّال کوزے 

بناتا توڑتا 

چاک پر بس جھکا رہا 

عشق سے دل دکھا رہا

وہ دساتیر جو افق پہ مستور

لذتِ حرف میں مسرور

ان کی 

ورق گردانی کرتا رہا 

وہ 

غم زدہ دیوتا 

شیرینئ زباں گھولتا رہا

ن م راشد