جب سے دیکھا ہے ترا روئے بہار آلودہ

جب سے دیکھا ہے تِرا رُوئے بہار آلودہ

چشمِ ہستی نظر آتی ہے خمار آلودہ

رنگ لایا ہے کسی بلبلِ دیوانہ کا خون

سرخئ گل سے ہے دامانِ بہار آلودہ

یاس و حسرت کا سماں کیوں ہے فضا پر طاری 

غم سے ہے کیوں چمنِ لیل و نہار آلودہ

روئے رنگیں پہ پریشاں ہیں سنہری زلفیں

جیسے ہو اک گلِ شاداب، غبار آلودہ

شمعِ امید کی کرنیں ہیں پریشاں اخترؔ

دل کا آئینہ کچھ ایسا ہے غبار آلودہ

اختر شیرانی