دل اپنا اس پہ جو شیدا ہوا تو ایسا ہوا

دل اپنا اس پہ جو شیدا ہوا تو ایسا ہوا

سنا ہر اک نے یہ چرچا ہوا تو ایسا ہوا

رہا کھٹکتا رقیبوں کی آنکھوں میں عاشق

اگر وہ سوکھ کے کانٹا ہوا تو ایسا ہوا

دیا دم ایسا کہ دم ہی نکل گیا دم میں

وہ میرے حق میں مسیحا ہوا تو ایسا ہوا

ڈبویا مجھ کو بجھائی نہ میرے دل کی آگ

رواں جو گریۂ دریا ہوا تو ایسا ہوا

یہ ضعف ہے نہیں اٹھ سکتا سر بھی تکیہ سے

مریضِ غم تِرا اچھا ہوا تو ایسا ہوا

یہ ایک دل ہے برابر ہزار دشمن کے

کوئی جو دوست بھی اپنا ہوا تو ایسا ہوا

تمام عمر ظفؔر ہم رہے پریشاں حال

کسی کی زلف کا سودا ہوا تو ایسا ہوا

بہادر شاہ ظفر