نامرادی کا یہ عالم بھی تو اے دل نہ رہے

نامرادی کا یہ عالم بھی تو اے دل نہ رہے

ہم تو اب ترکِ تعلق کے بھی قابل نہ رہے

بزمِ مقتل جو سجے کل تو یہ امکان بھی ہے

ہم سے بسمل تو رہیں آپ سا قاتل نہ رہے

یوں تو ہر شخص ہے اندیشۂ رہزن کا اسیر

کارواں نیتِ رہبر سے بھی غافل نہ رہے

آج اس نے شرفِ ہم سفری بخشا تھا

اس طرح سے کہ مجھے خواہشِ منزل نہ رہے

سامنے تُو ہو تو سو خواہشیں جاگ اٹھتی ہیں

کاش اب کے مِری آنکھوں میں مِرا دل نہ رہے

لوگ کس طرح سے آئینہ صفت جیتے ہیں

میں تو مر جاؤں اگر کوئی مقابل نہ رہے

جو بھی ہو صاحبِ محفل وہی کہتا ہے فراؔز

کہ وہ اٹھ جائے جو محفل سے تو محفل نہ رہے

احمد فراز