تو مجھ سے بات نہ کر اتنے سخت لہجے میں

تُو مجھ سے بات نہ کر اتنے سخت لہجے میں

میں خود مثال ہوں اپنی کرخت لہجے میں

ابھی تلک مِرے لہجے میں خاکساری ہے

ابھی میں لایا نہیں تاج و تخت لہجے میں

ابھی ابھی تو تِرا لہجہ دھوپ ایسا تھا

کہاں سے اُگ پڑے اتنے درخت لہجے میں

دِیے کو بھی میں پکاروں تو ٹمٹما کے بجھے

وہ تیرگی ہے مِرے تیرہ بخت لہجے میں

شکستہ لہجے میں کس نے مجھے پکارا ہے

میں لخت لخت ہوا، لخت لخت لہجے میں

سعید دوشی