ہم ہی کیوں کار اذیت سے گزارے جائیں

ہم ہی کیوں کارِ اذیت سے گزارے جائیں

عشق مذہب ہے تو ایمان سے سارے جائیں

میں نہ یوسف نہ مِرے ہجر میں رونے والی

مثلِ یعقوب، کسی آنکھ کے تارے جائیں

یہ بھی ڈر ہے جو کسی پیڑ پہ پتھر پھینکوں

ساتھ پھل کے نہ کہیں گھونسلے سارے جائیں

ہم بھی ہیں کہف کی دیواروں سے لپٹی روحیں

یونہی سو کر نہ کہیں عمر گزارے جائیں

اور بھی نکھریں گے اعرابِ وفا سے انجم

ہم پہ الفاظ محبت کے اتارے جائیں

آصف انجم