ظل الہیٰ عشق ہے عالم پناہ عشق

 ظلِ الہیٰ عشق ہے عالم پناہ عشق

اس پوری کائنات میں اک بادشاہ عشق

یہ بزم بزمِ خیر ہے چپ کر کے بیٹھئیے

یہ جائے احترام ہے، یہ بارگاہ عشق

پڑھ لی ہے گر نماز تو دھمال کر میاں

مسجد تِری تو ہے نہیں یہ خانقاہ عشق

مجھ پر یہ کفر و شرک کے فتوے فضول ہیں

درویش آدمی ہوں، مِرا بس گناہ عشق

میں چاہتا ہوں روند کے رکھ دے مِرا بدن

آ لگ مِرے گلے مجھے کر دے تباہ عشق

میثم کہاں تُو میثمِ تمّار وہ کہاں

ایسا بھی اب نہیں ہے تِرا خیر خواہ عشق

میثم علی آغا