امید معجزہ یک نظر پہ زندہ ہیں

 امیدِ معجزۂ یک نظر پہ زندہ ہیں

طبیبِ شہر دعا کر، اثر پہ زندہ ہیں

ہم اہلِ حاجت و اربابِ احتیاج تو کیا

فقیہہِ شہر بھی اب حبِ زر پہ زندہ ہیں

یہ اور بات کہ حاکم تھے بیشتر نااہل

ہم ایسے لوگ تو صرفِ نظر پہ زندہ ہیں

خدا کرے کہ ہوا کو ابھی پتہ نہ چلے

کہ کچھ چراغ مرے بام و در پہ زندہ ہیں

رہِ وفا میں ابھی ہیں کچھ ایسے لوگ کہ جو

سفر سے بڑھ کے خیالِ سفر پہ زندہ ہیں

عطا ہوئی جنہیں دربار سے کبھی خلعت

خیالِ بخششِ بارِ دگر پہ زندہ ہیں

پروین شاکر