ایک مدت ہوئی اک زمانہ ہوا

 ایک مدت ہوئی اک زمانہ ہوا

خاکِ گلشن میں جب آشیانہ ہوا

زلفِ برہم سے جب سے شناسائی ہے

زندگی کا چلن مجرمانہ ہوا

پھول جلتے رہے چاند ہنستا رہا

آرزو کا مکمل فسانہ ہوا

داغ دل کے شہنشہ کے سکے نہیں

دل کا مفلس کدہ جب خزانہ ہوا

راہبر نے پلٹ کر نہ دیکھا کبھی

راہرو راستے کا نشانہ ہوا

ہم جہاں بھی گئے ذوق سجدہ لیے

ہر جگہ آپ کا آستانہ ہوا

دیکھ مضراب سے خوں ٹپکنے لگا

ساز کا تار مرگ ترانہ ہوا

پہلے ہوتی تھی خوئےوفا پروری

اب تو ساغر یہ قصہ پرانا ہوا

ساغر صدیقی