محبتوں کو کہیں اور پال کر دیکھو

 محبتوں کو کہیں اور پال کر دیکھو

متاعِ جاں کو بدن سے نکال کر دیکھو

بدل کے دیکھو کبھی نسبتوں کی دنیا کو

بدن کو روح کے خانے میں ڈال کر دیکھو

سنو اسے تو سماعت سے ماوراء ہو کر

جو دیکھنا ہو تو آنکھیں نکال کر دیکھو

یقین دشت سے پھوٹے گا آب جو کی طرح

کہ حرف "لا" کی گواہی بحال کر دیکھو

بدن کی پیاس بھی اک ماوراء کہانی ہے

ہر ایک بوند کو دریا خیال کر دیکھو

پلٹ کے آئیں گے ساون کے رنگ آنکھوں میں

تم اپنے آپ سے رشتہ بحال کر دیکھو

تم اپنے گوہرِ یکتا کو اس طرح ڈھونڈو

کہ خود کو بے سر و ساماں خیال کر دیکھو

احمد شناس