جاگا ہوا ہوں اور نہ سویا ہوا ہوں میں

 جاگا ہوا ہوں اور نہ سویا ہوا ہوں میں

ایسا تِرے خیال میں کھویا ہوا ہوں میں

سب کو سنا رہا ہوں لطیفے نئے نئے

حالانکہ پھوٹ پھوٹ کے رویا ہوا ہوں میں

خود کو کسی طرح نہیں کر پاتا ہوں الگ

کچھ اس طرح سے اس میں سمویا ہوا ہوں میں

تجھ سے تِرا خیال زیادہ حسین ہے

چپ رہ کہ تیری یاد میں کھویا ہوا ہوں میں

مرجھا رہا ہوں اور نہ پھل پھول آتے ہیں

کیا جانے کس زمین میں بویا ہوا ہوں میں

ڈھونڈا تمام عمر جسے میں نے آج تک

اس نے مجھے بتایا کہ کھویا ہوا ہوں میں

لگتی ہے اجنبی سی مجھے خود مِری صدا

برسوں پہ اپنے آپ سے گویا ہوا ہوں میں

تو اپنے سر پہ سارے گنہہ لے لے اے کمال

سب کہہ رہے ہیں؛ دودھ کا دھویا ہوں میں

احمد کمال حشمی