میں نے ہرغم کو محبت کا ثمر جانا ہے

 میں نے ہرغم کو محبت کا ثمر جانا ہے

ہر مصیبت کو فقط گردِ سفر جانا ہے

مجھ کو آتا نہیں زخموں کی نمائش کرنا

زخم تو زخم ہے ہر حال میں بھر جانا ہے

وہ بھٹکتا ہی رہا دہر کی تاریکی میں

جس نے آغاز کو انجامِ سفر جانا ہے

مجھ کو معلوم ہے کیا شے ہے محبت کا جنون

زندہ رہنا ہے کبھی جاں سے گُزر جانا ہے

شاخ سے گُل کا بچھڑنا کوئی آسان نہیں

کبھی بِکنا، کبھی مُرجھا کے بِکھر جانا ہے

جِینا ہے گر تو جیو ایسے کہ تمثیل رہے

زندگی کو تو بہر حال گزر جانا ہے

اک تماشا ہے، یہاں زندگی کرنا حیدر

ختم جب ہو گا تو پھر لوٹ کے گھر جانا ہے

ذوالفقار حیدر پرواز