ہر رات تیری یاد کو سینے سے نکالا

 ہر رات تیری یاد کو سینے سے نکالا 

جیسے کسی مُورت  کو دفینے سے نکالا

اک خواہشِ ناکام کو اس کوچۂ دل سے

بدلے تیرے تیور تو قرینے سے نکالا

پاؤں تِری دہلیز پہ رکھنے کے سزاوار

تُو نے جنہیں تکریم کے زینے سے نکالا

سِکہ نہیں چلتا تِری سرکار میں، ورنہ

کیا کیا نہ ہُنر ہم نے خزینے سے نکالا

ہم ایسے بُرے کیا تھے کے نفرت نہ محبت 

 رکھا نہ کبھی پاس، نہ سینے سے نکالا

ٹھوکر میں طلب کی رہے ہر عمر میں ہم جان 

یوں جیت کے مفہوم کو جینے سے نکالا

اوریا مقبول جان