اجالوں میں نہ پھر اپنا فسانہ عام ہو جائے

 اُجالوں میں نہ پھر اپنا فسانہ عام ہو جائے

جھٹک دو زُلف کو اپنی گھنیری شام ہو جائے

خیالوں کی حسیں دنیا بڑی سنگین ہوتی ہے

محبت میں کوئی ناحق نہ پھر بدنام ہو جائے

سلیقے گُفتگو کے جاننے بے حد ضروری ہیں

تکلّم تلخ ہو تو آدمی گُمنام ہو جائے

محبت کے سفر میں راستے دشوار لگتے ہیں

نکالو پھر کوئی ترکیب اپنا کام ہو جائے

چلو کشمیر چل کے دیکھتے ہیں پھُول کی وادی

حسیں پھُولوں کی وادی میں کوئی گُلفام ہو جائے

جو صنفِ شاعری کے بحر سے اوزان سے عاری

غزل کی صنف میں تابش وہی ناکام ہو جائے

تابش رامپوری