تہ خنجر کیے سجدے مسلماں ایسے ہوتے ہیں

عارفانہ کلام منقبت سلام مرثیہ

 خدا کی راہ میں کارِ نمایاں ایسے ہوتے ہیں

تہِ خنجر کِیے سجدے مسلماں ایسے ہوتے ہیں

وہ پیاری پیاری شکلیں دیکھ کر آلِ پیمبرﷺ کی

ستاروں نے کہا؛ اے چاند! انساں ایسے ہوتے ہیں

جوانی رَن سے کہتی آ رہی ہے لاشِ قاسمؑ پر

کہ اسلامی جواں مَردوں کے ارماں ایسے ہوتے ہیں

مسافر کا تنِ بے سر ہے اور شب کا اندھیرا ہے

کسی کی لاش پر گیسو پریشاں ایسے ہوتے ہیں

قدم پر شہؑ کے دَم نکلا حبیب ابنِ مظاہر کا

محبت کے وفا کے عہد و پیماں ایسے ہوتے ہیں

خدا ہی جانے دل سے کیا کہا ہو گا نگاہوں نے

سکینہؑ کو خبر کیا تھی کہ زِنداں ایسے ہوتے ہیں

سنا کر نجم قصہ کربلا والے شہیدوں کا

مسلمانوں کو سمجھا دو مسلماں ایسے ہوتے ہیں

نجم آفندی

میرزا تجمل حسین