یوں تو کیا کیا حسیں نہیں ملتا

 یوں تو کیا کیا حسِیں نہیں ملتا

کوئی تیرا قرِیں نہیں ملتا

جس کو دل کا سکون کہتے ہیں

آدمی کو کہیں نہیں ملتا

کوئی درمانِ ذوقِ نظارہ

تا دمِ آخریں نہیں ملتا

آگ لگتی ہے خانۂ دل میں

آب اگر آتشیں نہیں ملتا

یوں تو اکثر حسیں ستاتے ہیں

تجھ سا درد آفریں نہیں ملتا

عمر شیشوں کے درمیاں گزری

مثلِ دل آبگیں نہیں ملتا

مہ و خورشید کی قلمرَو میں

تجھ سا زہرہ جبیں نہیں ملتا

بشارت گیلانی