یہ کس نے کہا ماتم شبیر نہ ہو گا

عارفانہ کلام منقبت سلام مرثیہ

یہ کس نے کہا ماتم شبیرؑ نہ ہو گا 

ہے خواب جو شرمندہ تعبیر نہ ہو گا 

جو بُغض ہے شہ سے اسے تم لاکھ چھپاؤ 

کیا نامۂ اعمال میں تحریر نہ ہو گا 

جو بیعت فاسق کے لیے سر کو جُھکا دے

وہ لاکھ کہے؛ پیروئے شبیر نہ ہو گا

دنیا میں اگر بچ بھی گئے دُشمن شبیرؑ

کیا قہر الٰہی بھی عناں گیر نہ ہو گا؟

وہ خود نہ رہے نام ہے اللہ کا باقی 

جو کہتے تھے اب نعرۂ تکبیر نہ ہو گا

جس جس نے دکھایا ہے دل فاطمہؑ زہراؑ

کیا حشر میں وہ لائقِ تعزیر نہ ہو گا

جاتے ہیں تو شبیرؑ کے ہمراہ ہیں اصغرؑ 

لوٹیں گے تو آغوش میں بے شیر نہ ہو گا

جس طرح پھرائے گئے در در حرم شاہ 

رُسوا کوئی یوں صاحب توقیر نہ ہو گا

بیمار کو غش آ گیا زِندانِ بلا میں

کچھ دیر کو اب نوحۂ زنجیر نہ ہو گا

عزت تو ہے اک رکن عزائے شہؑ والا 

یہ فخر کبھی باعث تحقیر نہ ہو گا

عزت لکھنوی