ترے آزار مرتے جا رہے ہیں

 تِرے آزار مرتے جا رہے ہیں

مِرے اشعار مرتے جا رہے ہیں

خوشی ناپید ہوتی جا رہی ہے

کہ اب تہوار مرتے جا رہے ہیں

خزائیں بال کھولے ناچتی ہیں

گل و گلزار مرتے جا رہے ہیں

کہانی کس طرف کو چل پڑی ہے

سبھی کردار مرتے جا رہے ہیں

حویلی دل کی ویراں ہو گئی ہے

در و دیوار مرتے جا رہے ہیں

مجھے مرمر کے جینا پڑ رہا ہے

مِرے غمخوار مرتے جا رہے ہیں

بہت ارزاں ہوئی ہے آدمیت

کہ اب معیار مرتے جا رہے ہیں

ہم اپنی ذات کے زنداں میں ارشد

پسِ دیوار مرتے جا رہے ہیں

ارشد محمود