سچائی کو کہانی بنتے دیکھا ہے

 سچائی کو کہانی بنتے دیکھا ہے

میں نے خون کو پانی بنتے دیکھا ہے

سُونی ہوتے دیکھی ہے دل کی بستی

محفل کو ویرانی بنتے دیکھا ہے

ٹوٹتے دیکھا رسم و رواجوں کا پنجرہ

خواہش کو من مانی بنتے دیکھا ہے

وقت بگڑ جانے کی فقط افواہوں پر

خلقت کو بے گانی بنتے دیکھا ہے

پیاز کے چھلکے مہنگے ہوتے دیکھے ہیں

اشکوں کو ارزانی بنتے دیکھا ہے

بنتے دیکھا ہے آسانی کو مشکل

مشکل کو آسانی بنتے دیکھا ہے

خواب میں اس کو دیکھا راجہ بنتے

خود کو اس کی رانی بنتے دیکھا ہے

گرم چمکتی دھوپ میں اُس کے آنے پر

موسم کو بارانی بنتے دیکھا ہے

ایک طرح کے منافق لوگوں کو

وقتی یار جانی بنتے دیکھا ہے

ریحانہ روحی