دل کا مقسوم تھا محو غم جاناں ہونا

 دل کا مقسوم تھا محوِ غمِ جاناں ہونا

اسی آئینے سے سیکھے کوئی حیراں ہونا

اپنی ہی انجمنِ شوق میں ہو نغمہ سرا

تنگ ہے غیر کی محفل میں غزلخواں ہونا

زندگی کیا ہے تِری یاد تِرا ذکرِ جمیل

بندگی کیا ہے تِرے نام پہ قرباں ہونا

دل یہ کہتا ہے پشیمانِ محبت ہو جا

درد کہتا ہے نہ منتِ کش درماں ہونا

ان سے اتنا نہ ہوا پُرسشِ غم ہی کرتے

ہم سے دیکھا نہ گیا ان کا پریشاں ہونا

عاشقی ضبط ہے اور ضبط ہے رعنائیِ زیست

عشق کی شان نہیں چاک گریباں ہونا

مجھ کو ان شوخ نگاہوں نے بنایا کافر

جن کو منظور نہ تھا میرا مسلماں ہونا

ہائے، اس اشکِ جگر سوز کی قسمت فاروق

جس کی قسمت میں نہ ہو پلکوں پہ فروزاں ہونا

بشیر فاروق