شایان شان تری کر سکیں بیاں​ اتنی مجال معنی الفاظ میں کہاں

عارفانہ کلام حمدیہ کلام

شایان شان تری کر سکیں بیاں​

اتنی مجال معنی الفاظ میں کہاں​

میں بندہ فقیر و گنہگار، اور تُو​

غفار و پرورگار و مددگار و مہرباں​

پروردگار! قادرِ مطلق ہے تِرا نام​

اک حرف کُن سے تُو نے بنائے ہیں دو جہاں

​یکتا ہے تِری ذات، دوامی ہیں تِری صفات​

قلبِ بشر میں ہے جو نہاں، ہے تجھ پر عیاں​

اندازہ و خیال و قیاس و گماں سے دور​

تو ہر فضائے غیب و یقیں میں ہے ضوفشاں​

سوچوں تو ارد گرد سے، دیکھوں تو آس پاس ​

محسوس گر کروں تو دل و جاں میں ہے تُو نہاں​

مالک! تِری ثنا ہے مِرا مرکز خیال​

ہوتا ہے ہر کرن کی مِرے فن سے تو عیاں​

طائر ہوا کے دوش پہ ماہی درون آب​

شمس و قمر خلا میں ہیں تِرے ہی مدح خواں​

قمر زیدی