سن لے جہاں کی داستاں، خاموش رہ
تُو ہی نہیں یاں نکتہ داں، خاموش رہ
گفتار کے بازار میں الفاظ کی
اب کچھ نہیں قیمت میاں، خاموش رہ
محفل یہ ساری پارساؤں کی ہے یاں
حسنِ ادب مت کر بیاں، خاموش رہ
سن لوں ذرا گویائی کا کربِ نہاں
چُپ رہ دِلا، نوکِ زباں خاموش رہ
روٹھی ہوئی یادوں سے باتیں بند کر
تنہائی دیتی ہے اذاں، خاموش رہ
یہ بھی نہیں ہے سُود مند اپنے ليے
اب چھوڑ دے فکرِ زیاں، خاموش رہ
مُلا نے یوں ایمان کی تجدید کی
کھا، پی، چلا اپنی دُکاں، خاموش رہ
آئینے بول اٹھیں گے میری داستاں
زحمت نہ کر اے رازداں! خاموش رہ
یحییٰ خان یوسفزئی
No comments:
Post a Comment