جنون عشق کی غارت گری نہیں نکلی

 جنونِ عشق کی غارت گری نہیں نکلی

جو دل میں پھانس چُبھی تھی ابھی نہیں نکلی

ہزار بار تِرے در تلک رسائی ہوئی

ہمارے دل سے مگر بُزدلی نہیں نکلی

ڈٹا ہوا ہے اُسی ایک بات پر اب تک

دلِ خراب! تِری خود سری نہیں نکلی

نہ جانے کس لیے تم بدگمان ہو مجھ سے

کوئی بھی بات زباں سے ابھی نہیں نکلی

حضور! آج بھی آیا نہیں پیامِ خلوص

بھڑاس آج بھی دل کی مِری نہیں نکلی

حضور! شام کے ہونٹوں پہ کیوں اُداسی ہے

حضور! آج بھی کیا چاندنی نہیں نکلی

گُلِ بہار کی صورت روِش روِش مہکی

حصارِ عشق سے باہر کبھی نہیں نکلی

گل رابیل