آپ کے دم سے جوانی پر برستا ہے شباب

 عارفانہ کلام حمد نعت منقبت

 آپ کے دم سے جوانی پر برستا ہے شباب

وجہِ بوئے مشک و عنبر، باعثِ حسنِ گلاب

عقلِ کُل بھی آپ ہیں ختم الرسلؐ بھی آپ ہیں

اے نبیﷺ اُمی لقب، اے صاحبِ ام الکتاب

آپﷺ ہی ابرِ سخا ہیں آپ ہی بحرِ کرم

ورنہ ہر پل تشنگی ہے چار سو ریگ و سراب

بے مثال و بے بدل بے عیب ہیں بے داغ ہیں

سیرتِ اقدس نرالی ہے تو صورت لاجواب

بنتِ حوا کو ردائے عزت و عفت ملی

ابنِ آدم کو ملا اس در سے درسِ انقلاب

حسنِ انسانی سے روشن ہو گئے کون و مکاں

آپؐ نے رخ سے اتارا آدمیت کے نقاب

ہے ازل سے تا ابد سارا زمانہ آپ کا

ہم تو سطحِ زندگی پر چند لمحوں کے حباب

نواز کمال