ہوئی نہیں ابھی میرے مقام کی تشریح

 ہوئی نہیں ابھی میرے مقام کی تشریح

کٹیں گے ہاتھ تو ہو گی غلام کی تشریح

بوقتِ شام لبوں پر حروف چمکے تو

چراغ کرنے لگے تیرے نام کی تشریح

ہے استعارہ اداسی کا ڈوبتا ہوا دن

گھروں کو آتے پرندے ہیں شام کی تشریح

زبان رکھتا ہوں اور بول سکتا ہوں لیکن

یہ خامشی ہے تِرے احترام کی تشریح

کبھی وہ اپنے گریباں میں بھی ذرا جھانکیں

جو کر رہے ہیں حلال و حرام کی تشریح

اب آدھے رُخ سے نہ پردہ ہٹے تو اچھا ہے

یہ آدھا چاند ہے ماہِ تمام کی تشریح

بڑے نصیب سے پڑھتا ہے مقتدی کوئی

نماز ایسی کرے جو امام کی تشریح

تو کیا ضروری ہے ماتھے پہ ہاتھ بھی رکھوں

یہ میرا جھکنا بھی تو ہے سلام کی تشریح

جاوید عادل سوہاوی