رونے کا حال لکھ نہ رلانے کا حال لکھ

 رونے کا حال لکھ نہ رُلانے کا حال لکھ

لکھنا ہے گر تجھے تو زمانے کا حال لکھ

زنداں میں فاقہ کش یہ گزارے گا زندگی

انصاف دیکھ روٹی چُرانے کا حال لکھ

پہلے تو چھین منہ کے نوِالے غریب کے

پھر ان کی بھوک تُو ہی مٹانے کا حال لکھ

جو کر رہا ہے وعدہ تو کیا وہ نبھائے گا؟

اُس کا کہا سُنا تو فسانے کا حال لکھ

کب اپنے پاؤں چلتی ہے مفلس کی زندگی

کندھوں پہ بوجھ اِس کا اٹھانے کا حال لکھ

تھے جس قدر درخت وہ سب راکھ ہو گئے

جنگل میں آگ تو بھی لگانے کا حال لکھ

ہم تھے انا ہماری تھی پاؤں پڑی ہوئی

ظالم کو یوں ہمارے منانے کا حال لکھ

حسن و ادا کے ساتھ ہے چلاک وہ کہ یوں

دنیا کو انگلیوں پہ نچانے کا حال لکھ

پھر اِس کے بعد ترکِ محبت کی بات کر

پہلے پہل تو دل کے لگانے کاحال لکھ

پہلے لگا دے آگ تو خود اِس جہان میں

پھر سے اسے تو خود ہی بجھانے کا حال لکھ

وہ بن سنور کے آیا یوں بزمِ رقیب میں

اُس کے عجیب دل کو جلانے کا حال لکھ

انسان ہونا پہلے تُو ثابت تو کر عجیب

پھر جا کے تُو نبیؐ کے گھرانے کا حال لکھ

عجیب ساجد