اپنی شکستہ حالی پہ روئے تھے رات بھر

 اپنی شکستہ حالی پہ روئے تھے رات بھر

کشکولِ روحِ خالی پہ روئے تھے رات بھر

شب بھر عجیب سائے ڈراتے رہے ہمیں

فرقت کی رات کالی پہ روئے تھے رات بھر

برسات تھی کہ ٹوٹ کر برسی تمام رات

ہم دل کی خشک سالی پہ روئے تھے رات بھر

تنہائیوں کا ہم سے مداوا نہ ہو سکا

اپنے مکان خالی پہ روئے تھے رات بھر

دہلیز پہ جو اس کی تھا فرحت گزر ہوا

اپنے دلِ سوالی پہ روئے تھے رات بھر

فرزانہ فرحت