میں تین راتوں سے جاگ رہا ہوں

 میں خوش ہوں

میں تین راتوں سے جاگ رہا ہوں

مجھے پھر سے

بے خوابی کے دورے پڑ رہے ہیں

حالانکہ مجھے جیسا کہا گیا

میں نے ویسے کیا

میں صبح سورج کو

اپنے کندھوں پر لاد کر 

مغرب میں بوتا ہوں

جو اگلی صبح پھر اُگ آتا ہے

اس بار ایسا موسم لاؤں گا 

جس میں سورج اُگ نہ سکے

میں تمہاری آنکھیں

نہیں بھول پا رہا 

اگرچہ میں دن بھر 

سینکڑوں آنکھوں کے 

ہزاروں سوالات کے آگے

جوابدہ ہوتا ہوں

میں برین سرجری کے بارے میں سوچ رہا ہوں

ہائپو کیپس نکال لینے سے 

شاید یہ مسئلہ حل ہو

میرے بریف کیس میں 

میری امیدیں ہیں

حیرتوں کا کوٹ سِلوا کر پہن چکا ہوں

میرے گلے میں عقل کی ٹائی ہے

کلائی پر جلدی باندھ کر نکل رہا ہوں

ایک بڑی ناکامی کی تلاش میں

جو مجھے بتائے 

کہ تیرے چلے جانے کا دکھ

اس سے کم تھا

مجھے ذرد رنگ پسند ہے

میں مِری ہوئی تتلیوں کے پر

تصور میں دیکھتا ہوں

میں نفسیاتی مسائل کا شکار

اپنے میڈیسنز کو نئے لوگوں سے چھپاتا ہوں

میں خفا ہوں

میں اس چیتر کے چاند کے دُھندلے چہرے پر

لکھنا چاہتا ہوں

کہ؛ میں خوش ہوں

کیونکہ یہ سب میری برداشت سے باہر ہو رہا ہے

اسرار احمد لکوی