وطن کی نیلامی
اے میرے ارضِ وطن
اے میرے جلتے چمن
ہم کو منظور نہیں
تیرا نیلام ہو جانا
تیری مٹی کی زرخیزی
میں شامل خون ہمارا ہے
ہم ہی تیرے ہیں رکھوالے
ہم ہی مقروض ہیں تیرے
ہم ہی پر فرض بنتا ہے
تیری عزت و حُرمت کی
حفاظت جان دے کر ہم
کریں جب تک رہے گا دم
یہ کانٹے ہم نے خود بوئے
کِیا مسمار پھولوں کو
پڑے تھے نیندِ غفلت میں
بڑے مدہوش ہو کر ہم
کُھلی جب آنکھ دیکھا پھر
کسی گُلچیں نے آ کے سب
کلیوں کو مروڑا ہے
سبز پتوں اور شاخوں کو
بے رحمی سے توڑا ہے
چمن ویران چھوڑا ہے
مگر ماتم کریں کیوں ہم؟
چمن ویران ہونے پر
یہ ذلت اور رُسوائی
کمائی اپنے ہاتھوں کی
سزا اپنے گُناہوں کی
شاید ہم نے ہیں پائی
ابھی بھی وقت ہے باقی
چلو مل جل کے سارے ہم
تلافی سب خطاؤں کی
کریں رو رو کے سارے ہم
قدم آگے بڑھائیں ہم
خدا سے لو لگائیں ہم
اسی کا نام زیرِ لب
مسلسل گنگنائیں ہم
چمن میں پھر وہی رونق
دوبارہ لے کے آئیں ہم
مبارک لون
No comments:
Post a Comment