چاند سے ان کے چہرے پر گیسوئے مشک فام دو

عارفانہ کلام حمد نعت منقبت

چاند سے ان کے چہرے پر گیسوئے مشک فام دو

دن ہے کھلا ہوا مگر وقتِ سحر ہے شام دو

روئے صبیح اک سحر زلفِ دوتا ہے شام دو

پھول سے گال صبح دم مہر ہیں لالہ فام دو

عارضِ نور بار سے بکھری ہوئی ہٹی جو زلف

ایک اندھیری رات میں نکلے مہِ تمام دو

انﷺ کی جبینِ نور پر زلفِ سیہ بکھر گئی

جمع ہیں ایک وقت میں ضدیں صبح و شام دو

خیر سے دن خدا وہ لائے دونوں حرم ہمیں دکھائے

زمزم و بیرِ فاطمہؑ کے پئیں چل کے جام دو

ذاتِ حسنؑ حسینؑ ہے عَینِ شبیہِ مصطفیٰﷺ

ذات ہے اک نبیؐ کی ذات ہیں یہ اسی کے نام دو

پی کے پِلا کے مے کشو! ہم کو بچی کھچی ہی دو

قطرہ دو قطرہ ہی سہی کچھ تو برائے نام دو

ہاتھ سے چار یار کے ہم کو ملیں گے چار جام

دستِ حسنؑ حسینؑ سے اور ملیں گے جام دو

ایک نگاہِ ناز پر سیکڑوں جامِ مے نثار

گردشِ چشمِ مست سے ہم نے پئے ہیں جام دو و

سطِ مسبّحہ پہ سر رکھیے انگوٹھے کا اگر

نامِ الٰہ ہے لکھا ہ اور الف ہے لام دو

ہاتھ کو کان پر رکھو پا بہ ادب سمیٹ لو

دال ہو، ایک ح ہو، ایک آخرِ حرفِ لام دو

نامِ خدا ہے ہاتھ میں، نامِ نبیؐ ہے ذات میں

مہرِ غلامی ہے پڑی، لکھے ہوئے ہیں نام دو

نامِ حبیبﷺ کی ادا جاگتے سوتے ہو ادا

نامِ محمدیﷺ بنے جسم کو یہ نظام دو

نامِ خدا مرقعہ، نامِ خدا رخِ حبیبﷺ

بینی الف ہے، ہ دہن، زلفِ دوتا ہے لام دو

وحشی ہے ایک دل مِرا زلفِ سیاہ فام کا

بندشِ عشق سخت تر صَید ہے ایک دام دو

تلووں سے ان کے چار چاند لگ گئے مہر و ماہ کو

ہیں یہ انہیں کی تابشیں، ہیں یہ انہیں کے نام دو

گاہ وہ آفتاب ہیں گاہ وہ ماہتاب ہیں

جمع ہیں ان کے گالوں میں مہر و مہِ تمام دو

بازیِ زیست مات ہے موت کو بھی ممات ہے

موت کو بھی ہے ایک دن موت پہ اذنِ عام دو

اب تو مدینے لے بلا گنبدِ سبز دے دکھا

حامد و مصطفیٰ تِرے ہند میں ہیں غلام دو

حامد رضا خاں بریلوی