آیا ہے نام لب پہ رسول کریم کا

عارفانہ کلام نعتیہ کلام

آیا ہے نام لب پہ رسول کریمﷺ کا

جلوہ تڑپ اٹھا ہے ریاضِ نعیم کا

بحر عدن میں لاکھوں ہیں لولوئے شاہوار

کچھ رنگ و روپ اور ہے دُر یتیمؐ کا

اے اہل بزم! جانبِ بطحا چلا ہوں میں

پیغام لے کے آیا ہے جھونکا نسیم کا

خُلدِ بریں جچے مِری نظروں میں کس طرح

دیکھا ہے ایک پھول ریاضِ نعیم کا

اللہ رے خاکِ بیتِ مقدس کا مرتبہ

مسجود ذرہ ذرہ ہے عرشِ عظیم کا

وحدت کو ناز کیوں نہ ہو احمدؐ کی ذات پر

سمجھا ہے راز جس نے الف لام میم کا

شافع اگر حضور رسالت مآبﷺ ہوں

پھر کیوں نہ فیض عام ہو ربِ کریم کا

شاہد نہ ہو سکا کبھی مشہود سے الگ

نورِ خدا ہے نور رسولِ کریمﷺ کا

کیونکر بیاں ہو مدحتِ خیر البشرؐ رتن

ہے تنگ قافیہ مِری طبعِ سلیم کا

پنڈت رتن پنڈوری