ایسا نہیں کہ جرأت اظہار مر گئی

 خود کلامیاں

ایسا نہیں کہ جرأتِ اظہار مر گئی

بس یہ ہوا کہ کہنے کو کچھ بھی نہیں بچا

ایسا نہیں کہ وقت نے سب زخم بھر دیے

بس یہ ہوا کہ درد کا احساس مر گیا

ایسا نہیں کہ شہر ہی ویران ہو گیا

بس یہ ہوا غریب کی کُٹیا اُجڑ گئی

ایسا نہیں کہ شاہ کا نقصان ہو گیا

بس یہ ہوا کہ بھوک سے کچھ لوگ مرگئے

ایسا نہیں کہ حسن کی چالیں تھیں کارگر

بس یہ ہوا کہ عشق تھا مجبور ہو گیا

ایسا نہیں کہ دشمنوں کا وار چل گیا

بس یہ ہوا کہ دوست مجھے ہاتھ کر گئے

ایسا نہیں کہ رات اذیت میں کٹ گئی

بس یہ ہوا کہ چین سے سویا نہیں گیا

ایسا نہیں کہ دل سے تِری چاہ مر گئی

بس یہ ہوا کہ ہجر مجھے راس آ گیا

ایسا نہیں کہ بن تیرے زندہ نہ رہ سکا

بس یہ ہوا کہ زندگی اک بوجھ بن گئی

ایسا نہیں کہ عشق نے برباد کر دیا

بس یہ ہوا کہ خواب مِرے راکھ ہوگئے

ایسا نہیں کہ منزلِ مقصود دور تھی

بس یہ ہوا کہ راستے پر پیچ ہو گئے

ایسا نہیں کہ بچھڑے تو دنیا اجڑ گئی

بس یہ ہوا کہ زندگی اک روگ بن گئی

ایسا نہیں کہ وعدے اسے یاد تک نہ تھے

بس یہ ہوا کہ اس سے نبھائے نہیں گئے

ایسا نہیں کہ ذوقِ نظارہ نہیں رہا

بس یہ ہوا کہ مجھ پہ تجلی نہیں پڑی

ایسا نہیں کہ آنکھ سے بینائی چھن گئی

بس یہ ہوا کہ حسرتِ دیدار مر گئی

ایسا نہیں کہ درد مِرا لا علاج تھا

بس یہ ہوا کہ چارہ گری ماند پڑ گئی

ایسا نہیں کہ زیست میں موقع نہیں ملا

بس یہ ہوا مفاد اٹھایا نہیں گیا

ایسا نہیں کہ بھا گئیں عزلت نشینیاں

بس یہ ہوا کہ محفلیں بے کیف ہو گئیں

ایسا نہیں کہ جام ہی آیا نہ ہاتھ میں

بس یہ ہوا کہ منہ سے لگایا نہیں گیا

ایسا نہیں کہ گردشِ حالات تھم گئی

بس یہ ہوا کہ خوفِ زیاں محو ہو گیا

ایسا نہیں کہ ہاتھ نہ تلوار تک گیا

بس یہ ہوا مقابلے میں یار آ گئے

ایسا نہیں کہ حوصلے فولاد ہو گئے

بس یہ ہوا کہ ظرف نے رونے نہیں دیا

ایسا نہیں سوال تِرے لا جواب تھے

بس یہ ہوا مروتیں دیوار بن گئیں

ایسا نہیں کہ ڈوبنا میرا نصیب تھا

بس یہ ہوا سہارے کو تنکا نہیں ملا

ایسا نہیں فریب تِرے جانتا نہ تھا

بس یہ ہوا کہ جان کےانجان بن گیا

ایسا نہیں کہ لفظ مِرے معتبر نہ تھے

بس یہ ہوا انہیں کبھی سمجھا نہیں گیا

ایسا نہیں کہ خود سے نہیں سامنا ہوا

بس یہ ہوا کہ جب بھی ملے خواب میں ملے

چبھتے سوال ہیں مِرے خود ہوں جواب دہ

پڑھ سن کے دیکھ الفی مِری خود کلامیاں

افتخار حسین الفی