شہر طیبہ کے چمن کی ہر کلی کی خیر ہو

 عارفانہ کلام نعتیہ کلام

شہر طیبہ کے چمن کی ہر کلی کی خیر ہو 

میرے آقاﷺ کے مدینے کی گلی کی خیر ہو

سوئے طیبہ جا رہے ہیں قافلے عشاق کے 

ہر گدائے مصطفٰیؐ کی حاضری کی خیر ہو

مانگتے ہیں خیر اکثر لوگ اپنے واسطے 

مصطفٰیؐ کے لب پہ ہے ہر اُمتی کی خیر ہو

آپﷺ کے صدیقؓ کا رتبہ رہے بالا سدا 

آپؐ کے شبیرؑ و شبرؑ اور علیؑ کی خیر ہو

جب بلالؓ با صفا کو کافروں نے دی سزا 

عشق بولا تِری عاشق عاشقی کی خیر ہو

آپؐ کو پہنچا دیا جب غار میں صدیقؓ نے 

خود خدا بولا؛ تمہاری دوستی کی خیر ہو

کربلا میں حق ادا تُو نے کیا اسلام کا 

اے علیؑ کے لال تیری بندگی کی خیر ہو

لکھ رہے ہیں جو ثنائے مصطفٰیؐ ناصر سدا 

ایسے سارے شاعروں کی شاعری کی خیر ہو

ناصر چشتی