نہ جانے کون سا بار سفر زیادہ ہے

  نہ جانے کون سا بارِ سفر زیادہ ہے

گماں گزرتا ہے کاندھوں پہ سر زیادہ ہے

پھلوں میں پچھلے برس بھی مٹھاس تھوڑی تھی

شجر پہ اب کے برس بھی ثمر زیادہ ہے

پڑوسیوں پہ بھی لوگوں کو اعتبار نہیں

خدا کے خوف سے دنیا کا ڈر زیادہ ہے 

جبلتیں ہی رہی ہیں ضمیر پر حاوی

فصیل شہر سے حدِ نظر زیادہ ہے

میں لوح وقت پہ لکھا ہوں کس قرینے سے

نہ کوئی زیر نہ کوئی زبر زیادہ ہے

تمام عمر ہی گزری اسی طرح لیکن

دباؤ ان دنوں کچھ ذہن پر زیادہ ہے 

نسیم! جس کی توقع تھی بادشاہوں کو

وہ چہل پہل فقیروں کے گھر زیادہ ہے

نسیم عباسی