غبار شعلہ بجاں اب بھٹکنے والا ہے

 غبارِ شعلہ بجاں اب بھٹکنے والا ہے

مِرے سفر کا مقدر چمکنے والا ہے

تِری چٹکتی ہوئی دھوپ کی ہتھیلی پر

سنا ہے رنگ دھنک کا مہکنے والا ہے

تجھے خبر ہی نہیں خواب کے کنارے پر

تُو میری آنکھ سے خوشبو کو تکنے والا ہے

وہ کیا ہے موسمِ ہجرت کے ابر پارے میں

جو بوند بوند ہوا سے ٹپکنے والا ہے

ابھی تو چاند نکلنے کی شادمانی میں

کسی کے خواب سے پردہ سرکنے والا ہے

یہی وہ آبلۂ چشم کا شگوفہ ہے

جو نوکِ خار پہ اک دن چٹکنے والا ہے

میں اس شرار کو اکسا رہا تھا سانسوں سے

مجھے لگا کہ وہ آنکھیں جھپکنے والا ہے

فریبِ شاخ و شجر، دامِ آب و دانہ سے

نیا پرند کئی دن جھجکنے والا ہے

شفق سوپوری